សាសនាចក្រនៃព្រះយេស៊ូវគ្រីស្ទ សហការជាមួយរាជរដ្ឋាភិបាលកម្ពុជាបើកសម្ភោធមន

អែលឌើរ ខេលី ចនសុននៃគណៈប្រធានតំបន់អាស៊ី នៃសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ បានអញ្ជើញចូលរួមជាមួយសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា និងភ្ញៀវ កិត្តិយសផ្សេងទៀតក្នុងពិធីសម្ពោធអគារមន្ទីរពេទ្យថ្មី តេជោសែនកោះធំ នៅខេត្តកណ្តាល ។ ពិធីសម្ភោធនេះបានគូសចំណាំពីការបញ្ចប់គម្រោងមនុស្សធម៌ដ៏ធំបំផុតមួយ ដែលមិនធ្លាប់មាននៅតំបន់អាស៊ីនៃសាសនាចក្រ ដែលជាកិច្ចសហការជាច្រើនឆ្នាំរវាងសាសនាចក្រ និងរាជរដ្ឋាភិបាលកម្ពុជា និងអ្នកដែលចូល រួមចំណែកផ្សេងៗទៀត ដើម្បីពង្រីកលទ្ធភាពការថែទាំសុខភាពប្រកបដោយគុណភាពដល់ប្រជាពលរដ្ឋរហូតដល់ជាង ៤០០,០០០ នាក់ នៅក្នុងតំបន់នេះ ។

1 / 2

Download Photos

មន្ទីរពេទ្យរដ្ឋដែលបានដាក់ឈ្មោះរបស់សម្តេចអគ្គមហាសេនាបតីតេជោ ហ៊ុន សែន អតីតនាយករដ្ឋមន្ត្រីនៃព្រះរាជាណាចក្រកម្ពុជានេះ ត្រូវបានបង្កើតឡើងក្រោមការផ្តួចផ្តើមគំនិតរបស់ ឯកឧត្តម ស៊ុន ចាន់ថុល ឧបនាយករដ្ឋមន្ត្រីនៃព្រះរាជាណាចក្រកម្ពុជា ដោយមានការសហការពី ឯកឧត្តមសាស្រ្តាចារ្យ ឈាង រ៉ា រដ្ឋមន្រ្តីក្រសួងសុខាភិបាល និងមន្ទីរពេទ្យកាល់ម៉ែត ។ សាសនាចក្រតាមរយៈកិច្ចខិតខំលើកកម្ពស់សុខភាពកម្ពុជា (CHIE) របស់ខ្លួន បានដើរតួអ្នកបរិច្ចាគដ៏សំខាន់ក្នុងការអភិវឌ្ឍគម្រោងនេះ ដោយមានអ្នកជំនាញផ្នែកវេជ្ជសាស្ត្រមនុស្សធម៌របស់សាសនាចក្រសហការជាមួយក្រុមគ្រប់គ្រងមន្ទីរពេទ្យលើការរចនាមន្ទីរពេទ្យ និងផ្តល់មូលនិធិសម្រាប់ឧបករណ៍ជាច្រើនប្រភេទដែលត្រូវការសម្រាប់ថតរូបភាពរោគវិនិច្ឆ័យ ការវិភាគមន្ទីរពិសោធន៍ ការស្តារនីតិសម្បទា ការថែទាំជំងឺធ្ងន់ធ្ងរ ការវះកាត់ សម្ភព និងការថែទាំទារកទើបនឹងកើត ទន្តសាស្រ្ត និងការគ្រប់គ្រងការឆ្លងមេរោគ ។

1 / 2

Download Photos

មុនពេលសាងសង់មន្ទីរពេទ្យថ្មីនេះ សាសនាចក្រក៏បានដើរតួនាទីយ៉ាងសំខាន់ក្នុងការជួសជុល និងបំពាក់គ្រឿងបរិក្ខារនៅតំបន់ក្បែរនោះនៅ មណ្ឌលសុខភាពពោធិ៍រាមា ដើម្បីបម្រើជាអគារបណ្ដោះអាសន្ន ។ ការចំណាយលើការជួសជុលភាគច្រើនត្រូវសាសនាចក្របានផ្តល់ជាមូលនិធិ ដែលអនុញ្ញាតឲ្យមជ្ឈមណ្ឌលនេះផ្តល់ការថែទាំចាំបាច់ ខណៈដែលមន្ទីរពេទ្យដើមកំពុងរើចេញ និងសាងសង់ឡើងវិញ ។

ក្នុងការទទួលស្គាល់ការរួមចំណែកយ៉ាងសំខាន់របស់សាសនាចក្រ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា បានប្រគល់មេដាយជូន អែលឌើរ ចនសុន នូវមេដាយជាតូបផ្កាក្នុងពិធីនេះ ។ កិត្តិយសនេះគូសបញ្ជាក់អំពីតម្លៃដែលបានដាក់លើកិច្ចសហការរបស់សាសនាចក្រ និងការខិតខំប្រឹងប្រែងរបស់ខ្លួនក្នុងការជួយដល់សុខភាព និងសុខុមាលភាពរបស់ប្រជាជនកម្ពុជា ។

Techo-Sen-Koh-Thom-Hospital-Inauguration-in-Cambodia
អែលឌើរ ខេលី អរ ចនសុន ឈរជាមួយសម្តេចមហាបវរធិបតី ហ៊ុន ម៉ាណែត បន្ទាប់ពីទទួលបានមេដាយជាតូបផ្កា ក្នុងការទទួលស្គាល់ការរួម ចំណែក របស់សាសនាចក្រដល់មន្ទីរពេទ្យតេជោសែនកោះធំ នៅថ្ងៃទី ១៣ ខែ មីនា ឆ្នាំ ២០២៤ នៅខេត្តកណ្តាល នៃប្រទេសកម្ពុជា ។ 2024 by Intellectual Reserve, Inc. All rights reserved.

អែលឌើរ ចនសុន បានសង្កត់ធ្ងន់លើការជួយទូទាំងពិភពលោក និងឥទ្ធិពលនៃកិច្ចខិតខំប្រឹងប្រែងផ្នែកមនុស្សធម៌របស់សាសនាចក្រ ដែលអាចធ្វើទៅបានដោយទឹកចិត្តសប្បុរសពីសមាជិករបស់ខ្លួន ។ លោកបានមានប្រសាសន៍ថា « ដោយសារតែទឹកចិត្តសប្បុរសរបស់សមាជិកនៅជុំវិញពិភពលោក យើងអាចទាញយកធនធានទាំងនេះ និងផ្ដល់នូវការលើកកម្ពស់ដល់គ្រឿងបរិក្ខារពេទ្យដ៏ល្អៗ ដើម្បីផ្ដល់ពរដល់ប្រជាជនទាំងនេះ » ។

អគារដ៏ធំថ្មីលាតសន្ធឹងជិត ១២,០៧៧ ម៉ែត្រការ៉េ និងមានគ្រែចំនួន ១៥០ គ្រឿងបរិក្ខារពេទ្យទំនើបៗ និងបច្ចេកវិជ្ជាទំនើបៗ ដូចជាប្រព័ន្ធព័ត៌មានមន្ទីរពេទ្យជាដើម ។ មន្ទីរពេទ្យនេះបានត្រៀមខ្លួនជាស្រេចក្នុងការ លើកកម្ពស់ស្តង់ដាសេវាសុខភាពដល់ប្រជាពលរដ្ឋជាង ៤០០,០០០ នាក់ នៅស្រុកកោះធំ និងតំបន់ជុំវិញក្នុងខេត្តកណ្តាល និងខេត្តតាកែវ ដែលពីមុនត្រូវធ្វើដំណើរទៅព្យាបាលនៅភ្នំពេញ ឬមន្ទីរពេទ្យខេត្តឆ្ងាយៗ ។ មន្ទីរពេទ្យនេះគឺជាមន្ទីរពេទ្យរដ្ឋដ៏ធំដំបូងគេបង្អស់របស់ប្រទេសកម្ពុជាដែលទើបនឹងសាងសង់ក្នុងរយៈពេល ២០ ឆ្នាំ ។

នៅក្នុងសុន្ទរកថារបស់លោកក្នុងពិធីនោះ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា បានកោតសរសើរចំពោះការសម្រេចបាននូវគម្រោងមន្ទីរពេទ្យយ៉ាងឆាប់រហ័ស ដោយលោកមានប្រសាសន៍ថា « ការបញ្ចប់មន្ទីរពេទ្យតេជោសែនកោះធំ គឺជាសមិទ្ធផលដ៏អស្ចារ្យ ។ នៅពេលយើងបានឃើញផែនការនេះជាលើកដំបូង យើងរំពឹងថា វានឹងចំណាយពេលមួយទសវត្សរ៍ដើម្បីសម្រេចបាននូវចក្ខុវិស័យនេះ ។ ប៉ុន្តែ គម្រោងនេះចំណាយពេលតែ ពីរឆ្នាំប៉ុណ្ណោះ ដើម្បីសម្ពោធដាក់ឲ្យប្រើប្រាស់មន្ទីរពេទ្យនេះ ។

សម្តេចមហាបវរធិបតី ហ៊ុន ម៉ាណែត បានសង្កត់ធ្ងន់ថា « ការមានការវះកាត់ និងសម្ភពនៅមន្ទីរពេទ្យតេជោសែនកោះធំនេះនឹងជួយសង្រ្គោះដល់ជីវិត ។ ស្ត្រីក្នុងតំបន់នេះមានអត្រាមរណភាពមាតាខ្ពស់ដោយសារតែត្រូវធ្វើដំណើរមកភ្នំពេញទទួលសេវាសុខភាព ។ ឥឡូវនេះ ដោយមានសេវារបស់មន្ទីរពេទ្យនេះ យើងកំពុងឆ្លើយតបទៅនឹងតម្រូវការនោះ និងធ្វើឲ្យលទ្ធភាពទទួលបានសេវាថែទាំសុខភាពសំខាន់ៗបានកាន់តែប្រសើរឡើង » ។

1 / 2

Download Photos

ក្រោយពិធីសម្ពោធ លោកវេជ្ជបណ្ឌិត គាង ហុង នាយកមន្ទីរពេទ្យ តេជោសែនកោះធំ ដែលទើបចូលកាន់ដំណែង បានសម្តែងការដឹងគុណយ៉ាងស្មោះស្ម័គ្រចំពោះការគាំទ្រ ដែលធ្វើឲ្យមន្ទីរពេទ្យនេះបានក្លាយជាការពិត ។ លោកវេជ្ជបណ្ឌិត ហុង បានមានប្រសាសន៍ដោយសង្កត់ធ្ងន់លើកិច្ចខិតខំប្រឹងប្រែងរួមដែលនាំឲ្យគម្រោងដ៏មានការផ្លាស់ប្តូរនេះទទួលបានផ្លែផ្កាថា « ក្នុងនាមប្រជាពលរដ្ឋកម្ពុជា វេជ្ជបណ្ឌិត និងគិលានុបដ្ឋាយិកានៅមន្ទីរពេទ្យតេជោសែនកោះធំ ខ្ញុំសូមថ្លែងអំណរគុណចំពោះសប្បុរសជនទាំងអស់ដែលបានជួយឧបត្ថម្ភដល់មន្ទីរពេទ្យនេះ ទាំងកម្លាំងកាយ ចិត្ត និងសម្ភារ » ។

1 / 2

Download Photos

ការសម្ពោធមន្ទីរពេទ្យតេជោសែនកោះធំតំណាងឲ្យការបោះជំហានឆ្ពោះទៅមុខយ៉ាងមុតមាំសម្រាប់សេវាសុខភាពនៅកម្ពុជា និងបង្ហាញពីឥទ្ធិពលនៃកិច្ចសហការរវាងសាសនាចក្រ រដ្ឋាភិបាល និងអ្នកដែលពាក់ព័ន្ធក្នុងស្រុកក្នុងការដោះស្រាយតម្រូវការសំខាន់ៗ និងការបម្រើសហគមន៍ ។ វាក៏ឆ្លុះបញ្ចាំងពីការតាំងចិត្តរបស់សាសនាចក្រក្នុងការធ្វើតាមការដាស់តឿនក្នុងព្រះគម្ពីរឲ្យ « ចូរនឹកចាំក្នុងគ្រប់ការណ៍ទាំងអស់ពីមនុស្សទាល់ក្រ និងមនុស្សកម្សត់ទុគត៌ និងពីមនុស្សឈឺ និងមនុស្សមានទុក្ខវេទនា ដ្បិតអ្នកណាដែលមិនធ្វើការទាំងនេះទេ អ្នកនោះឈ្មោះថាមិនមែនជាសិស្សរបស់យើងឡើយ » ដែលមាននៅក្នុងគោលលទ្ធិ និងសេចក្ដីសញ្ញា ជំពូកទី ៥២ ខទី ៤០ ។

មន្ទីរពេទ្យតេជោសែនកោះធំគឺជាផ្នែកនៃកិច្ចសហការនៃ កិច្ចខិតខំលើកកម្ពស់សុខភាពកម្ពុជា (CHIE) របស់សាសនាចក្រ ដែលជាយុទ្ធសាស្រ្តថ្មីដើម្បីកែលម្អសេវាសុខភាព និងផ្ដល់ជំនួយសប្បុរសធម៌សម្រាប់ប្រជាជនកម្ពុជាដែលក្រីក្រ ។ ដោយមានកិច្ចសហការជាមួយរដ្ឋាភិបាល និងអ្នកដឹកនាំសេវាសុខាភិបាល CHIE ផ្តល់ការបណ្តុះបណ្តាល ឧបករណ៍ និងគម្រោងសាងសង់ជាច្រើន ។ កម្មវិធីនេះបានចាប់ផ្ដើមនៅឆ្នាំ ២០១៨ ដោយគណៈប្រធានតំបន់អាស៊ីនៃសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ។

Techo-Sen-Koh-Thom-Hospital-Inauguration-in-Cambodia

Techo-Sen-Koh-Thom-Hospital-Inauguration-in-Cambodia